ألغاز وجوائز

 إلي بيجاوب على الاغاز كلها صح له مني هدية راااائعة

- صلاة سرية بين جهريتين ؟؟

- شيء لا يمشي إلا بالضرب ؟؟

- شخص لا يزعل إذا أخرجت له لسانك ؟؟

- يوجد في أمريكا وألمانيا ولا يوجد في فرنسا وايطاليا ؟؟
- في الأرض اخضر وفي السوق اسود وفي المنزل احمر ؟؟
- كلما تضربه يصيح؟؟
- لا يتكلم ، إذا أكل صدق وإذا جاع كذب ؟؟
- شيء تأكله وليس بنبات ؟؟
- الصلاة التي لا وضوء فيها ؟؟
- له أسنان ولكن لا يعض ؟؟
- يقرصك ولا تراه ؟؟
- عائلة فيها ستة بنات وأخ واحد لكل منهم ، كم عددهم ؟؟

آيس كريم باسكن روبنز

المقادير :

كيك امريكانا بالفانيليا ( المستطيل وليس السويس رول ) - ( 1 ) قشطه - ( 6 ) حبات كيري - علبة دريم ويب - علبة كريم كراميل - لوز مجروش - توفي ( سكر محروق + قشطه )


طريقة التحضير :


يقطع الكيك إلى شرائح ( مثل التوست ) ثم يرص في صينية .

نضع في الخلاط ( الكيري – القشطة – الكريم كراميل – الدريم ويب ) ونخلط جيدا .

نصب نصف الخليط على شرائح الكيك ثم ننثر اللوز المبشور حتى نغطيه ثم نضع نصف خليك التوفي .

نضع طبقه أخرى من شرائح الكيك ثم ما تبقى من خليط الكيري ثم اللوز المبشور ثم ما تبقى من التوفي ويوضع في الثلاجة حتى يبرد ويقدم .



 

مسابقات ( 2 )

كل حد فاضي خليه يربط الكلمات المبعثرة التالية ويكون قصة خيالية من تأليفه : ( ويراوينا الابداع )

شمس  - شجرة - أسد - بحر - بيت - غابة - طعام - صديق

يوميات بنت في الجامعة ( 4 )

ما في احد يغمضني في الجامعة كثر إلي تبيع الذرة ( سابقا ) ، إنسانه طيبة وخدومة وتحب شغلها ومخلصة فيه ، يعجبني اجلس واسولف معاها ( ومنها بعد اقوي لغتي ال E شوي لأني بصراحة نسيتها من دخلت الجامعة ) كلمتني عن دراستها كانت حلوة مثل مغامرة في الغابات ( في الفلبين طبعا ) وبعد كلمتني عن حياتها وإنها عايشه مع عائلة تقربلهم لكن علاقتها معاهم مب زينه وما كانت تحب تزور أهلها الحقيقيين ما اعرف ليش؟؟ ( الحمد لله إنا مسلمين ) لا حظت إنها تحب تقرا وايد وحاولت إني احطلها كتب عن الإسلام بالفلبيني وال E لكن ما أظن إنها قرتهم لكن إن شاء الله مع الوقت الله يهديها وتسلم واجلس معاها في الجنة وتعزمني على ذرة هناك ( قولوا آمين ) ولاحظت إنها اجتماعيه وحبوبة كل طالبة تمشي تسلم عليها لا وبعد يحطون أغراضهم عندها ( صاير مكانها مخزن كتب ثاني ) وفي طالبة تأخذ عنها وصفات جمال ( بتاع كله ) ، أول ما تعرفت عليها قالتلي اسمها لكني نسيته ( صعب شوي ) وهيه ما شاء الله عيها فورا حفظت اسمي وكل ما تناديني استحي أقولها إني نسيت اسمها ( صارلي يمكن سنة ما أناديها إلا هلووو ) وشكلي راح أتعرف على صديقتها الثانية إلي تبيع العصير المثلج عرفتني عليها لكن للحين ما سولفت معاها ، شوي مضغوطة فالدراسة يوم أتعرف عليها بكتب مقالة عنها بإذن الله .

مسابقات ( 1)

انا بكتب اسم بلدة او مدينة وإلي بعدي تكتب بلدة ثانية تبدأ من آخر حرف انتهيت فيه ( فهمتواااا )

بسم الله يللا نبدأ

الامارات

يوميات بنت في الجامعة ( 3 )

أصعب شيء على الإنسان انه ينظلم وهو أدى واجبه وأكثر ، الله يسامح الدكتور ( .... ) حطلي درجة نازلة نزلت معدلي ( زووو ) والمشكلة إني كنت احضر كل حصة وما اتاخر واتجاوب معاه وما أتكلم في حصصه وفي السعي الأول يبت درجة نازلة شوي وانصدمت وبعدين في المنتصف شديت حيلي ويبت أعلى درجة في الصف ومدحني ووصلني السماء وقالي أنتي بتييبين ( A+ ) لو شديتي حيلج في السعي الثاني ، وفعلا شديت حيلي ويبت درجة زينه وطلب منا بحث من ( 30 – ما لا نهاية ) صفحة وسويتله بحثه إلي يباه وكان مرتب لكنه ( 30 ) صفحة بالضبط ( اضعف الإيمان ) وفي الامتحان النهائي تعبت وأنا أذاكر ( 3 ) ايااام وأراجع بعد ( آآه يالقهر ) وبعدين حطلي ( C ) فقط لا غير ، وأنا الذكية ما كنت اعرف عن التظلم وبلعت هواء وسكت ، ويوم داومنا الفصل الثاني شجعوني البنات إن ارفع تظلم ورحت يمين ويسار ورجعت يمين ويسار وكل واحد يطرشني عند الثاني ( لأنهم يقولون إن وقت التظلم انتهى ) عشان جيه تعبت وياهم وفوق كل هذا مارفعت التظلم ( الله يسامح إلي كان السبب ) والمشكلة الأكبر والأعظم إن مكتب دكتوري الكريم قسم الأولاد يعني ما بحصله خير شر ( حاولت أدور في القاعات يوم أكون فاضيه يمكن أحصله لكن ما شي فايده ) ولين الحين مقهورة الله يسامحه لو كنت اعرف انه بيحطلي ( C ) لكنت ارتحت شوي وما ضغطت على عمري لكن الحمد لله على كل حال ( عشان اتأدب مرة ثانية وما اضغط على عمري عند أي دكتور معروف عنه انه يمشي على المنحنى إلي لين الحين أنا ما اعرف نظامه لكن اعرف انه بالحظ .

رجيمي

كل إلي يشوفوني يقولولي ضعفتييييييييييييييي ، والسبب بعد فضل الله هذا الرجيم :

اليوم الاول : جميع انواع الفواكه ماعدا الموز
اليوم الثاني : جميع انواع الخضروات ( سلطة )
اليوم الثالث : فواكه + سلطة
اليوم الرابع : 8 موزات + 4 اكواب حليب قليل الدسم
اليوم الخامس : 6 طماطات + كوب رز اسمر ( خبز اسمر )
اليوم السادس : سلطة + خبز اسمر
اليوم السابع : سلطة + خبز اسمر + عصائر الفواكة

مع شرب 10 اكواب ماء يوميا

                 والنتيجة
                     v
                     v
                     v  ِ

  

شعر ( 2 )

فجأة انقلبت الأمور على أعقابها*** صار سافل حياتنا فأعلاها



صرنا نهتم بفلانة ولباسها***وعلانة مدري شخبارها بخلانها


وصار هم صغارنا مثل كبارنا*** وصار فرق السنين مب فحسابنا


بالأول احسب إني كنت ممنوع عن الشاشة وأفلامها***والحين تسأل عيالنا عن أحلاها


وشايبنا بدل حكمته بهبالنا***وصار يتابع فنانته وأخبارها


وعجوزتنا واكبت الموضة بأحلاها*** وما رضت بدبي ومحلاتها

سافرت فرنسا واشترت فستانها***وكملت لتايلند وخذت كريماتها


اهتمت فحالها ونست حال عيالها*** لبسهم ممزق وصغير مب فقياسها


فوق الركب وكاشف الأكتاف مع حبالها *** تشوفها تقول يستر الله على حالها


وولدنا ما تعرف جده من هباله*** خربط بحياته ومحد داري عن أفعاله


لا حسيب ولا رقيب ولو طاح الفاس ***بالراس .. قلنا يا لطيف


يا أمة الإسلام عيدوا شريط أمجادنا ***خلنا نفخر بسيدنا وتاج راسنا


خلنا نبدل تفكيرنا وأفعالنا*** ونركز على دينا وكتابنا


والله يجمعني بكم في جناتنا*** ترى ما قلته إلا من هبالنا

يوميات بنت في الجامعة ( 2 )

في يوم من الأيام قررنا أنا وصديقاتي ( كاملات الدسم ) إنا نخفف من وزنا ( نسوي رجيم ) وفعلا بدينا وتحمسنا ، وبدينا نتفلسف على بعضنا مسويين نفسنا أخصائيات تغذية .. هذا يضعف وهذا ابتعدوا عنه ولا تأكلون مناقيش وحتى فتا شيز ممنوع ( أكلنا المعتاد في الجامعة ) لا وبعد منعونا من العصاير العادية بس الطازجة ( شو أسوي ، أنا ما أحب إلا البرتقال و البقالة ما عندها إلا جزر مع البرتقال ).
 وبديت أخرب والعب شوي من وراهم إلى آن كشفت نفسي قدام مجموعة ( الخيزرانات ) قاموا ودبلوني طلوع ونزول الدرج إلى في الجامعة ( 5 ) مرات ( البعيد طبعا عشان محد يشوفنا ) آآآآآآآخ تعبت لا وبعد كل هذا طرشوني للتصوير ( بعد التدبيل ) صرت مراسلة لهم عشان يحركوني أكثر ، ويوم وقفت في زحمة التصوير عشان أصور الأوراق قامت ريولي ترتجف ( ما تشيلني ) وحسيتا ني بدوخ ومن يومها ما طلعت على الدرج ( أهم شيء في الإنسان صحته وإلا ؟؟؟ ) ،
 هيييييه نسيت أخبركم عن أول يوم طلعنا ونزلنا فيه الدرج ( الحقيقة كان يوم عجييييييب ) ( 4 ) بنات متحمسين طالعين نازلين على الدرج ( بالله أتخيلوا أشكالنا ) هاهاها على قولة وحدة فينا كأننا ( خرفان سايبة ) ، بعدين وقفنا وقسمنا نفسنا مجموعتين ( 2 ) ( 2 ) وبدينا الجد ، وفجأة ما نشوف إلا بنتين يشوفونا ويضحكون ، لا وبعد يصورونا ( صديقاتنا لكن الضعيفات ) وبعدين الله عاقبهم واخترب تلفون وحدة فيهم وعللللللق ( تستاهل تصورنا تبا تضحك علينا ، الله راواها ) .


والى الآن ما زال الجهد متواصل لتخفيف الزائد من الأوزان وشكلنا بعد فتح الجيم في الجامعة راح نسجل هناك ( لان هذي الأحداث كانت قبل الجيم ) وسأطلعكم على كل جديد بإذن الله ، ادعولنا نضعف .

شعر ( 1 )

تجيلك ساعات متضايق ........... وتجيلك ساعات مستانس

ما تعرف شو إلي أزعجك ......... أو شو إلي قلب مصرانك

أو شو إلي أسعدك .................... وشرح صدرك وأقوالك

وأنا أقولك حكم قلبك ............................ واختبر أفعالك

واعرف انك لا ضقت ....................... هذه نتايج شيطانك

وإذا انشرح صدرك وفرحت ................. هذه نتايج إيمانك

واعرف انك راح تسعد ................. في الدارين وفي حسابك

إذا تمسكت بطريق الخير .................. وتوازن مؤشر إيمانك

يوميات بنت في الجامعة ( 1 )

مرت علي مواقف كثيرة فالجامعة وراح اعرض أبرزها :-


بعد عناء الثانوية العامة ومع بداية الإجازة الحقيقية بالنسبة لي ، جاني خبر وهز كياني وهو هان الجامعة قسم التربية ( علوم ورياضيات ) ما تسجل البنات إلا إذا كان عندهم  التوفل  ( هوه خبر كاذب طبعا الله يسامح إلي وصلاه لي ) ومن يومها بدأت المعاناة .... دورت عن معهد ادرس فيه التوفل وأضيع فيه إجازتي وكثفت مجهودي عشان أخد التوفل قبل موعد التسجيل فالجامعة وفعلا راحت إجازتي لكن ما أخذت التوفل وفي موعد التسجيل 31 – 8 - ....م
 ( نسيت أقولكم إن فيه خبر ثاني جاني وهزني مرة ثانية وهو هان المعهد إليِ ادرس فيه مب معترف فيه ، وبعد هذا خبر كاذب ) المهم سرت أسجل في الجامعة وأنا متضايقة وأفكر في التوفل وفي المعهد إلي مب معترف فيه وووو المهم أثناء التسجيل وصلت عند شخص ما اعرف منو هوه وأعطاني الخبر اليقين وهو إن قسم التربية ( رياضيات وعلوم ) ما يحتاج له توفل :)  :(  :/ :0 .... فعلا هذي الوجوه تنطبق علي في هذي اللحظة ، فرحانة لأني افتكيت من التوفل و زعلانة لأن إجازتي خلصت عال فاضي ومستغربة ومصدومة ووو لكن المهم هو إني إلى الآن لو اعرف هذا الشخص خاطري أشله على راسي وأدور فيه الجامعة  ( طبعا على طول نسيت طريق المعهد بعد الخبر اليقين )
 وفي أول يوم دراسي لي 2 – 9 - ...... م وهي فترة السحب والإضافة لكن أنا جديدة في الجامعة وما اعرف نظام الجامعة داومت من أول محاضرة ( متحمسة وااااااايد :)  طبعا ما في توفل ) لكن إلي تعبني نفسيا هو إن ما كان احد يحضر بس أنا حتى الدكاترة ما يجوون ، كل يوم أجي الجامعة من الصبح للظهر وما في احد اعرفه ، لا اعرف دكتور ولا صديقة ( هذا غير التعب إلي تعبته لين فهمت غلى الجدول والقاعات و J و JJ .... الخ ) مر أسبوع على هذي الحالة ( وما أغيب بعد متحمسة :) ) ولكن بالأسبوع الثاني بديت أمل وأتضايق وكنت كل ما ارجع البيت اصييييح ( أف كانت أيام كئيبة ما أبا أتذكرها ) و مرت الأيام إلى أن تعرفت على صديقات والحمد لله على نعمة الأصدقاء فعلا الحياة بدونهم صعبة .